Koloreen bingoa

Umeek hiztegi berria entzutea eta horretara ohitzea, aurrerago, eurek ekoitzi ahal izateko.

Ume bakoitzak bere kartoia edukiko du eta hezitzaileak koloretako fitxaz betetako poltsa bat.
Hezitzaileak fitxa bat aukeratu eta atera ondoren, erakutsi barik, hor ikusten duen kolorea izendatuko du.
Umeek ikusi beharko dute ea euren kartoietan entzundako kolore hori agertzen den. Hala bada, kolore hori ezabatu, estali… egin beharko dute.
Kartoietan dituzten kolore guztiak estalitakoan, BINGO esan beharko dute. Lehenengo esaten duena, irabazle.

Ekintza hau behin baino gehiagotan erabiltzea komeni da, eta beti ere, umeen mailaren arabera eta gaiaren une ezberdinetan txertatuz:
- Hasieran, hezitzaileak fitxan duen kolorea ahoskatzearekin batera, kolorea bera ere erakutsi egingo du.
- Hurrengo, hitza esango du. Tartetxoa utzi, eta ume guztiek euren kartoietan begiratu dutela ziurtatu ostean, koloredun fitxa erakutsi egingo du.
- Hezitzaileak hitza esango du, baina ez du kolorea erakutsiko.
- Azkenik, umeak eurak jar daitezke poltsatik koloreak ateratzen eta dagokien hitza esaten.
Hurrenkera hori zaintzea komeni da, errazenetik zailenera.