Animalien hasierako bingoa

Umeek hiztegi berria entzutea eta horretara ohitzea, aurrerago, eurek ekoitzi ahal izateko.

Ume bakoitzak bere kartoia edukiko du eta hezitzaileak fitxaz betetako poltsa bat.
Hezitzaileak fitxa bat aukeratu eta atera ondoren, erakutsi barik, hor ikusten duen animalia izendatuko du.
Umeek ikusi beharko dute ea euren kartoietan entzundako animalia agertzen den. Hala bada, irudi hori ezabatu, estali… egin beharko dute.
Kartoietan dituzten irudi guztiak estalitakoan, BINGO esan beharko dute. Lehenengo esaten duena, irabazle.

Hainbat animalia landuko dira gai osoan zehar. Guztira animalia asko dira eta izen gehiegi dira hasieratik lantzeko. Horregatik, hasierako bingo honetan, horma-irudian agertzen diren animaliak bakarrik landuko dira, bai bingoan eta baita bikote-jolasean ere. Bestalde, beste bingo bat dago gaiaren amaieran lantzeko: “Animalien amaierako bingoa”. Gai guztian zehar landutako animalia guztiak bilduko dira bertan.
Bingo hau behin baino gehiagotan erabiltzea komeni da, eta beti ere, umeen mailaren arabera eta gaiaren une ezberdinetan txertatuz:
- Hasieran, hezitzaileak fitxan duena ahoskatzearekin batera, irudia erakutsiko du.
- Hurrengo, hitza esango du. Tartetxoa utzi, eta ume guztiek euren kartoietan begiratu dutela ziurtatu ostean, irudia erakutsi egingo du.
- Hezitzaileak hitza esango du, baina ez du irudirik erakutsiko.
- Azkenik, umeak eurak jar daitezke poltsatik irudiak ateratzen eta dagokien hitza esaten. Hurrenkera hori zaintzea komeni da, errazenetik zailenera.